Dagana 28. maí til 1. júní dvaldist hér hjá okkur ásamt fríðu föruneyti Pétur Halldórsson, meistaranemi í líffræði við Háskóla Íslands. Tilgangur ferðarinnar var að fanga norðlenska himbrima (Gavia immer), en Ísland er eina landið í Evrópu þar sem þessi mikilfenglegi vatnafugl verpir að staðaldri.

Hópurinn var svo heppinn að ná einum fugli. Var hann merktur og mældur auk þess sem blóð- og fjaðrasýnum var safnað. Þá hafa verið festir dægurritar (e. geolocator) á himbrima í verkefninu, en slík tæki mæla birtutíma og gefa þannig upp staðsetningu. Fuglunum þarf að ná aftur til að hægt sé að nálgast upplýsingarnar sem tækið geymir svo við bíðum spennt eftir að fá frekari fréttir af ferðum íslenskra himbrima.

Einnig mætti á svæðið þriggja manna tökulið undir stjórn Jóns Arnar Guðbjartssonar, sviðsstjóra markaðs- og samskiptasviðs HÍ og umsjónarmanns þáttanna Fjársjóður framtíðar. Fylgdu þeir rannsóknahópnum eftir einn dag og náðu frábærum myndum og myndskeiðum af þeim fanga og meðhöndla himbrima. Sjá má nokkrar myndir af þessu ævintýri hér að neðan.

Pétur með nyrsta himbrima sem merktur hefur verið á Íslandi

Jóhann Björn og Jón Örn stilla sér upp með himbrimann

Félagar?

Fuglinn merktur og mældur.

Tignarlegur fugl, sem er vissara að meðhöndla af fagmennsku

Verkefnið er styrkt af Náttúruverndarsjóði Pálma Jónssonar og naut hópurinn aðstoðar Guðmundar Arnar Benediktssonar, fuglaáhugamanns á Kópaskeri, við val á rannsóknarsvæðum.