Fyrsti fundur INTERACT  fasa II var haldinn í Keflavík dagana 24. til 27. janúar 2017. INTERACT er alþjóðlegt samstarfsnet rannsóknastöðva á norðurslóðum og var fundurinn haldinn í tilefni þess að stór styrkur hefur fengist í gegnum Horizon2020 verkefni Evrópusambandsins til að halda áfram og víkka út starfsemi INTERACT. Var verkefnið, og þeir níu vinnupakkar sem það samanstendur af, kynnt og samhæfing innan þess rædd.

Rannsóknastöðin Rif kemur að þremur vinnuhópum innan INTERACT fasa II; vinnupakka 3, 5 og 7. Vinnupakki 3 kallast „Station Manager Forum“ og er þar um að ræða samráðsvettvang stjórnenda rannsóknarstöðva samstarfsins. Vinnupakki 5 heldur utan um fjölþjóðlegan aðgang að stöðvum (Transnational Access), en í gegnum hann geta erlendir vísindamenn sótt um dvöl á Rifi til að vinna þar rannsóknarverkefni. Síðast en ekki síst á Rif aðild að vinnupakka 7  sem fjallar um innleiðingu lífríkisvöktunar á norðurslóðum. ÞAð verkefni sem vinna á að er á vegum CAFF (Conservation of Arctic Flora and Fauna) og kallast CBMP (Circumpolar Biodiversity Monitoring Program). Auk Rifs eru tvær aðrar rannsóknastöðvar aðilar að þessum vinnupakka, rannsóknastöðin í Cambridge Bay í Kanada og grænlenska stöðin Zackenberg. Eiga þessar þrjár stöðvar að vinna í sameiningu að innleiðingu þeirrar þurrlendis- og ferskvatnsvöktunar sem CBMP áætlunin segir til um. Rannsóknastöðin Rif mun þar þjóna sem líkan fyrir innleiðingu vöktunarinnar frá grunni. Verkefnið er afar mikilvægt fyrir áframhaldandi uppbyggingu stöðvarinnar sem og fyrir aukna vöktun og rannsóknir á lífríki norðausturhorns Íslands. Slík uppbygging er einnig í fullu samræmi við stefnur og skuldbindingar Íslands á alþjóðavettvangi. 

Hér að neðan má sjá myndir frá fundinum, en auk almennrar umræðu um verkefnin framundan og vinnustofur í tengslum við þau var farið í skoðunarferð um Reykjanesið. Þá var aðstaða og starfsemi Þekkingarseturs Suðurnesja kynnt en Þekkingarsetrið er einnig aðili að INTERACT og sá um undirbúning og utanumhald fundarins í Keflavík. 

Fundað á Park-inn Radison Hotel í Keflavík

Fjallað um rannsóknir á Svalbarða

Sindri Gíslason, forstöðumaður náttúrustofu Suðvesturlands segir frá rannsóknum í húsinu

Halldór Pálmar Halldórsson, forstöðumaður rannsóknaseturs HÍ á Suðurnesjum uppfræðir hópinn

Byggðasafn Suðurnesja skoðað

Staðið á milli Evrasíu- og Norðurameríkuflekans

Dr. Jan Dick frá miðstöð vistfræði og vatnafars í Skotlandi og Hanna María Kristjánsdóttir forstöðumaður Þekkingarseturs Suðurnesja

Reykjanestáin, þar sem Atlantshafshryggurinn kemur á land.

Hanna María með Eldey í baksýn, en þar var síðasti geirfuglinn drepinn.

Við Gunnuhver á Reykjanesi

Reykjanesviti