Árið 2015 fékk Rannsóknastöðin Rif grafíska hönnuðinn Dóru Haraldsdóttur til að vinna að gerð merkis fyrir stöðina. Lagt var upp með að merkið yrði einfalt en einkennandi – bæði fyrir staðsetningu Rifs og þá starfsemi og markmið sem stöðin stendur fyrir.

Úr varð það merki sem nú prýðir síðuna en þar sameinast útlínur sendlings (Calidris maritima sem er óopinber einkennisfugl Melrakkasléttu), norðurheimskautsbaugurinn og öldurnar í hafinu.

Dóra vann einnig bækling og kynningarveggspjald fyrir Rif, en þetta tvennt má nálgast hér á síðunni undir „útgefið efni“. Á heimasíðu Dóru má sjá fleiri dæmi um þau verk sem hún hefur unnið og hvetjum við ykkur eindregið til þess að kynna ykkur málið.